عدالت و آزادلیک پروردگاری نامی بیلن
بوتون دنیا 8-مارچ نی خلق‌ارا خاتین-قیزلر کونی صفتیده نشانله یدی. بوگون اجتماعي، اقتصادي، مدني و سیاسي یوتوقلری شرَفلنه دیگن همده جندر تېنگلیگی نینگ برچه حقوقي ساحه‌لرده‌گی اهمیتی تأکیدلنه دیگن کون حسابلنه دی. اما بیز افغانستانده اوشبو کوننی شونده‌ی بیر دورده نشانله یپمیزکی، خاتین-قیزلر تاریخلری نینگ اېنگ ظلمتلی دورلریدن بیرینی باشدن کچیرماقده‌لر.
طالبان گروهی نینگ حاکمیتنی قۉلگه آلیشی بیلن عیاللر نینگ اساسي حقوقلری قتّيق روشده پایمال قیلیندی و افغانستان جمعیتی بۉغیلیش همده استبدادگه دوچ کېلدی. خاتین-قیزلر مکتب و بیلیم یورتی لردن محروم قیلیندی، مینگلب عیاللر ایش جایلریدن هَیده لدی، اولر نینگ ناراضیلیک نمایشلری اېسه شفقتسیز باستیریلدی، حبسگه آلیندی، قییناقلرگه سالیندی، مجبوري تن آلیشلرگه و جنسي زۉرآورلیکلرگه دچار اېتیلدی. بیراق، شونگه قره‌مه‌ی، افغانستان عیاللری آزادلیک، تېنگلیک، عدالت و دېموکراسی اوچون کوره شنی دوام اېتتیرماقده‌لر.
طالبان حاکمیتنی اېگلله گنیدن سۉنگ، ظلم و جنایتلرگه قرشی بیرینچی بۉلیب قطعي و جدّي توریب چیققن کوچ – بو عیاللر بۉلدی و بوگونگی کونگچه اولر حیاتلرینی خوف آستیگه قۉیگن حالده کوره‌شنی دوام اېتتیرماقده‌لر. افغانستان خاتین-قیزلری اۉز طلب و ایستکلرینی آچیق و روشن افاده‌لش همده اولرنی حمایه قیلیش ضرورلیگینی انگلب یېتدیلر. حقیقتاً هم، آنگی اویغانگن عیال – افراطگرلیک، بنیاديیزم و آرتگه قَیتیش نینگ اساسي دشمنیدیر.
ملي مقاومت عالي کېنگشی عیاللر حقوقلری نینگ پایمال اېتیلیشی، اۉزباشیمچه‌لیک بیلن قماققه آلیش، جندر ایریمه چیلیگی، قییناق و عیاللر نینگ اجتماعي، سیاسي و مدني ساحه‌لردن چیقریب تشلنیشینی جندر آپارتایدی و انسانیتگه قرشی جنایت دېب بیله دی همده بو حالتنی کېسکین قاره‌له‌یدی. شو بیلن بیرگه، مملکتیمیز عیاللری نینگ آغیر احوالی باره‌سیده اۉز تشویشلرینی بیلدیره دی و افغانستان خاتین-قیزلری جمعیت حیاتیدن بوتونله ی چېتله‌تیلیشی نینگ خوفلی عاقبتلری باره‌سیده آگاهلنتیره‌دی.
ملي مقاومت عالي کېنگشی افغانستان خلقی، اینیقسه، عیاللر نینگ قانوني کوره شی و قرشیلیگینی قدرله‌یدی همده اولرنی وطن آنه نینگ حقیقي قۉریقچیلری و عسکرلری دېب بیله‌دی. شونینگدېک، کېنگش افغانستان خلقیگه اۉز یۉقاتلگن حقوقلرینی تیکلش، اینیقسه، عیاللر نینگ حقیقي اۉرنینی تاپیش یۉلیده هر قنده‌ی حرکت و سعی-حرکتلرنی عملگه آشیریشگه صادقلیگینی بیلدیره دی و اولر نینگ اسلامي و انساني قدریتلرینی تیکلشده یانلریده بۉلیشینی تأکیدله‌یدی. طالبان گروهی عیاللرگه نسبتاً قۉلله‌یاتکن سوزی، چېتله‌تیش و قۉرقیتیش بیلن اولرنی جمعیت و سیاستدن اوزاقلشتیره آلمه‌سلیگینی توشونیشی لازم. البته، طالبان اۉزی نینگ برچه جنایتلری اوچون جواب بېریشی کېره‌ک.
ملي مقاومت عالي کېنگشی افغانستان خاتین-قیزلری نینگ آغیر احوالینی خلق‌ارا هم‌جمعیت نینگ دقّت مرکزیگه قۉییش همده طالبانگه قرشی جهانی چېکلاولرنی کوچه یتیریش ضرورلیگینی تأکیدله‌یدی. بو ظالم رېجیم تۉلیق چیتله نیشی کېره‌ک. شونینگدېک، کېنگش عامه‌وي اخبارات واسطه‌لری و انسان حقوقلری تشکیلاتلریدن افغانستان عیاللری نینگ باستیریلیشینی حجتلشتیریش و بو باره‌ده خلق‌ارا هم جمعیت نی خبردار قیلیشنی طلب قیله‌دی.
ملي مقاومت عالي کېنگشی خلق‌ارا خاتین-قیزلر کونی مناسبتی بیلن برچه عیاللرنی، اینیقسه، افغانستان نینگ مرد و فخرلی عیاللرینی تبریکله‌یدی و تیلک بیلدیره‌دی کی، اولر هر قنده‌ی کمسیتیش و زۉرآورلیکدن خالی بۉلیب، انساني شأنی سه قلنگن حالده، اسارتدن آزاد بۉلیب، اۉز امکانیتلری نینگ اېنگ یوکسک چۉقّیلریگه اېریشسینلر. چونکه خاتین-قیزلرسیز افغانستان نینگ سیاسي و اقتصادي رواجلنیشی امکانسیزدیر.