عدالت و آزادلیک اېگه‌سی بۉلمیش الله نامی بیلن
افغانستاننی قوتقریشی اوچون ملي مقاومت عالي کېنگاشی، ملت بیرلیگی شهیدی – استاد عبدالعلی مزاری و اونینگ صفداشلری شهید بۉلگنی نینگ 30 ییللیگی مناسبتی بیلن، افغانستان خلقی، اونینگ ایزداش و طرفدارلریگه چوقور همدردلیک بیلدیره‌دی. همده ملت بیرلیگی شهیدی و مستقللیک، آزادلیک و عدالت یۉلیده جان فدا قیلگن برچه شهیدلرنی حرمت بیلن یادگه آله‌دی.
شهیدلر – بیز نینگ شرَفلی تاریخیمیز آسمانیده پارلب تورگن یولدوزلردیر. اولر مستقللیک، آزادلیک و یوکسک انساني همده اسلامي قدریتلرنی حمایه قیلیش یۉلیده فداکارلیک و جسارت کۉرسه‌تیب، بوگونگی و کېله‌جک اولادلر اوچون حقیقت یۉلینی یاریتیب بېردیلر.
ملت بیرلیگی شهیدی، استاد عبدالعلی مزاری، اوشبو یارقین یولدوزلردن بیری بۉلیب، افغانستان نینگ زمانه‌وي تاریخیده مهم و تأثیرچن شخصلردن بیری اېدی. او مملکت سیاسي و اجتماعي جریانلریده کتّه رۉل اۉینه‌گن. دستلب، او “نصر تشکیلاتی” آستیده خلق کوچلرینی سفربر اېتگن، کېینچه‌لیک اېسه “اسلامي وحدت حزبی”نی تشکیل قیلیب، اینیقسه مملکت نینگ مرکزي حدودلریده ساوېت اتفاقی باسقینیگه قرشی مقاومت کۉرسه‌تیشده اساسي رۉل اۉینه‌گن. ملت بیرلیگی شهیدی برچه افغانستان خلقلری، اېرکک و عیال نینگ تېنگ حقوقلی بۉلیشینی طلب قیلگن همده هر قنده‌ی ظلم و کمسیتیشلرگه قرشی کوره‌شگن. او افغانستانده‌گی برچه ملتلر و سیاسي همده اجتماعي گروهلر بیرلیکده حرکت قیلیشی کېره‌ک، دېب حسابله‌گن و شونده‌‌گینه مملکتده برقرار تینچلیک و مستحکملیک تأمینلنیشینی تأکیدله‌گن. او افغانستان تاریخیده عدالت و بیرلیک رمزیگه ایلندی. شو سببلی، 2016 ییلده افغانستان ملي بیرلیک حکومتی اونگه “ملت بیرلیگی شهیدی” عنوانینی بېردی.
بوگون، افغانستاننی قوتقریش اوچون ملي مقاومت عالي کېنگاشی ملت بیرلیگی شهیدی وفاتی نینگ 30 ییللیگینی نشانلر اېکن، مملکت سۉنگگی تۉرت ییل ایچیده طالبان رژیمی آستیده چوقور سیاسي، اقتصادي و بشری انقراضگه یوز توتگنینی علیحده تأکیدله‌یدی. 2001 ییلدن کېینگی انسان حقوقلری، عیاللر حقوقلری، سۉز اېرکینلیگی و عامه‌وي اخبارات واسطه‌لری ساحه‌سیده‌گی برچه یوتوقلر یۉققه چیقدی. افغانستان اقتصادیاتی آغیر ضرر کۉردی، نتیجه‌ده آچرچیلیک و قشّاقلیک کېنگ ترقه‌لدی. ایشسیزلیک، زۉرآورلیک و تینیمسیز هجوملر میلیونلب انسانلرنی اۉز وطنینی ترک اېتیشگه مجبور قیلدی. مملکت ترورچی گروهلر اوچون خوفسیز پناه‌گه ایلندی، اینیقسه، سابق حکومت خدمتچیلری و خوفسیزلیک کوچلریگه باسیم تاباره آرتیب بارماقده. قۉپارووچی حبسگه آلیشلر، قییناقلر، قاتللیکلر و عیال محبوسلرگه زۉرآورلیک حددن تشقری اوج آلدی. طالبان رژیمی اۉزی نینگ تار توشونچه‌سیگه اساسلنگن قالاق دیني تفسیرلر بیلن افغانستان نینگ اجتماعي و مدني توزیلیشینی تۉلیق اۉزگرتیریب یوباردی. اولر نینگ رادیکال تروریستیک یاندشووی دوام اېتر اېکن، جمعیتده‌گی بغری کېنگلیک و هم‌جهت لیک تاباره ضعیف لشیب بارماقده.
شهید استاد عبدالعلی مزاري مملکت نینگ سیاسي-اجتماعي اۉزگریشلری و تاریخي انقراض سببلرینی چوقور انگله‌گن حالده، بو معمالرنی فقط اجتماعي عدالت، ملي بیرلیک و برچه اېتنیک گروهلرنی قمره‌ب آله‌دیگن سیاسي تیزیم آرقه‌لی حل قیلیش ممکن، دېب حسابله‌گن. او مرکزلشتیریلمه‌گن فدرا‌ل تیزیم طرفداری بۉلیب، بو توزیلمه برچه ملي، دیني، تیل و محلي گروهلرنی اولر نینگ رئال تأثیری و سانیگه قره‌ب سیاسي اشتراکچی صفتیده قمره‌ب آلیشی کېره‌ک، دېب تأکیدله‌گن.
افغانستاننی قوتقریشی اوچون ملي مقاومت عالي کېنگاشی مستقللیک و آزادلیک یۉلیده شهید بۉلگنلر نینگ بویوک آرزولریگه صادقلیگینی ینه بیر بار تصدیقله‌یدی. بیز اېرکین، عدالتپرور و ترقي اېتگن جمعیت قوریش یۉلیده برچه سعی-حرکتلریمیزنی سفربر قیله‌میز. شونینگدېک، بیز ینه بیر بار افغانستان نینگ میلیونلب شهیدلری، خصوصاً: ملت بیرلیگی شهیدی – استاد عبدالعلی مزاري، تینچلیک شهیدی – پروفیسور استاد برهاالدین رباني، ملي قهرمان – شهید احمدشاه مسعود، شهید جنرال عبدالرازق اچکزي، شهید حاجی عبدالقدیر، شهید سید مصطفی کاظمی، شهید عبداللمطلب بېک، شهید احمدخان سمنگاني، و مملکت آزادلیگی اوچون جان بېرگن برچه مشهور و نامعلوم شهیدلرنی حرمت بیلن یادگه آله میز همده اولر نینگ یوکسک آرزولریگه صادقلیک بیلدیره‌میز.
افغانستاننی قوتقریشی اوچون ملي مقاومت عالي کېنگاشی