بسم الله الرحمن الرحیم
حرمتلی وطنداشلر!
افغانستان تاریخیده صادر بۉلگن مهم واقعه‌لر ایچیده 1357 ییل 24 حوت کونی هراتده یوز بېرگن دهشتلی، قانلی و ویرانکار حادثه بوریلیش نقطه‌سی صفتیده بهالنه‌دی. شو سببلی، 24 حوت قۉزغلانینی فقط‌گینه ظلم و عدالتسیزلیککه قرشی چیققن خلق حرکتی دېب توشونیش ناتۉغری بۉله‌ردی. بو واقعاًی شونچه‌که خلق نینگ دیني و انساني قدریتلرینی آیاق آستی قیلگن ظالملرگه قرشی حسسي رئاکسیون صفتیده هم تلقین قیلیب بۉلمه‌یدی. اصلیده، بو واقعه کېنگ کۉلملی اویغانیش، اۉز-اۉزینی انگلش و جمعیتده‌گی اجتماعي-سیاسي مناسبتلرگه بۉلگن قره‌شلر نینگ اۉزگریشیگه تورتکی بۉلدی. بو حادثه شو قدَر چوقور ایلدیز آتگنکی، اونینگ عکس-صداسی بوتون افغانستان، منطقه و حتا بوتون دنیاده کتّه حرکتلر نینگ باشلنیشیگه سبب بۉلدی. شو باعث، افغانستان علمي جماعتچیلیگی اوشبو تاریخي بوریلیش نینگ سبقلرینی چوقور اۉرگنیب، تاریخ نینگ انسانیت اوچون عبرت منبعی اېکن لیگینی ینه‌ده روشنلشتیریشی لازم.
افغانستاننی قوتقریش بۉییچه ملي مقاومت عالي کېنگشی 1357 ییل 24 حوت شهیدلری نینگ پاک روحلریگه حرمت بجا کېلتیریب، ینه بیر بار طالبان حرکتیگه جدّي آگاهلنتیریش بېره‌دی. طالبان یېتکچیلری هېچ بۉلمه‌گنده سۉنگگی 150 ییللیک افغانستان تاریخیدن سبق آلیب، اۉزی نینگ اینجیقلیک و جاهلانه کبریدن واز کېچیشی، مملکت باشقرووینی بوتون خلق نینگ ایستک و منفعتلری اساسیده تشکیل اېتیش یۉلیگه اۉتیشی ضرور.
بوندن تشقری، اولر خلق‌ارا همجمعیت نینگ مسوولیتلی اعضاسی صفتیده حرکت قیلیب، افغانستان اقتصادي، مدني و اجتماعي ترقیاتیدن بهره‌مند بۉلیش یۉللرینی ایزلشلری لازم. خلق‌ارا تشکیلاتلر بیلن همکارلیکده، بوتون افغان خلقی نینگ اراده‌سینی عکس اېتتیره‌دیگن، قمراولی و قانوني سیاسي تیزیم برپا اېتیش یۉلیده ملي و خلق‌ارا ملاقاتلرگه امکان یره‌تیشلری کېره‌ک. بو تیزیم شونده‌ی بۉلیشی لازمکی، اونده رهبرلر خلق نینگ بې‌واسطه اراده‌سی و سیلاو آرقه‌لی تنلنسین. بوندن تشقری، بوتون مملکت منفعتلری یۉلیده، هر قنده‌ی اېتنیک کېلیب چیقیش، دیني اعتقاد، سیاسي قره‌شلر یاکه جندر تفاوتلریگه قره‌مه‌سدن، برچه فقرالر نینگ اساسي حقوقلرینی حرمت قیلیش ضرور. اینیقسه، مکتب و بیلیم یورتی لرنینگ اېشیکلری قیزلر و عیاللر اوچون آچیلیشی شرط.
شبهه‌سیز، ظلم، حاکمیتنی اۉزلشتیریش، عدالتسیزلیک و اجتماعي طبقه‌لنیش حکومتگه بۉلگن ایشانچسیزلیکنی ینه‌ده کوچه‌یتیریب، خلق نینگ ناراضیلیگینی آشیره‌دی. بو اېسه حکومت اساسلرینی یېمیریب، تېز آره‌ده اونینگ قوله‌شیگه سبب بۉله‌دی. چونکه خلق نینگ صبر-طاقتی چېکسیز اېمس.
شو مناسبت بیلن افغانستاننی قوتقریش بۉییچه ملي مقاومت عالي کېنگشی ینه بیر بار آزادلیک و عدالت یۉلیده جان فدا قیلگن برچه شهیدلر نینگ، خصوصاً، 1357 ییل 24 حوت شهیدلری نینگ مقّدس خاطره‌سینی یاد اېته‌دی. بیز اولر نینگ آرزولریدن الهام آلیب، مملکتنی آزاد، مستقل و عدالتلی سیاسي تیزیمگه اېگه قیلیش یۉلیده‌گی قانوني و ملي کوره‌شیمیزنی دوام اېتتیره‌میز.
افغانستاننی قوتقریش ملي مقاومت عالي کېنگشی