طالبان، چې له یوې ترهګریزې ستراتیژۍ او نړیوالې توطیې څخه راټوکېدلي، په خپل تور او شرموونکي تاریخ کې پرته له وحشت، بربریت، وژنې، انتحار او د بېګناه خلکو ځورونې بله لاسته راوړنه نه لري. دوی په دې وروستیو ورځو کې، چې د لوی اختر له مبارکو ورځو سره هممهاله دي، د هېواد په بېلابېلو سیمو کې د خلکو ځورونه، وېره اچونه او فشارونه زیات کړي دي.
په بدخشان کې د خلکو سرکوب او ځورول، چې د دې ډلې د افرادو له خپلسریو او ماجراجویو څخه ستړي شوي دي، په مرکزي ولایتونو کې د وسلوالو کوچیانو یرغلونه، په ځانګړي ډول د بهسود ولسوالۍ کې د بېوسه او بېدفاع خلکو پر کورونو بریدونه چې د طالبانو د ډلې له مستقیم ملاتړ سره تر سره شوي، په کابل کې د خلکو تهدید او سپکاوی، په دایکندي ولایت کې د قرباني د ذبحې په پلمه د خلکو نیول او ګواښل، چې د اهل تشیع د مراجع تقلید له فتواوو سره سم عمل کوي، او هلته د وېرې او وحشت فضا رامنځته کول، همداراز په فاریاب ولایت کې د دې ډلې د خپلسرو افرادو د ښکاره ظلم پر وړاندې د خلکو د اعتراض د سرکوب او ډلهییزو نیونو لړۍ—دا ټول د طالبانو ډلې د وروستیو ورځو یوازې یوه برخه ظلمونه او وحشتونه دي.
د افغانستان د ژغورنې لپاره ملي مجمع د طالبانو ډلې لهخوا د بېدفاعو افغانانو پر وړاندې په بېلابېلو سیمو کې د وروستیو ورځو ظالمانه او خپلسري اقدامات په کلکه غندي، او یو ځل بیا اعلان کوي چې دا ډله لا هم له خپلې ترهګرې ماهیت څخه لاس نهدی اخیستی، بلکې پر استبدادي کړنو یې لا نور ټینګار کړی دی.
هماغسې چې ځینې هېوادونه، لابيګروپونه او د دې ډلې ملاتړي په نړیوالو سازمانونو او رسنیو کې تبلیغ کوي، نه یوازې دا چې په دې ډله کې هېڅ بدلون نه دی راغلی، بلکې د لا زیات استبداد او سرکوب لپاره یې نوې میکانېزمونه رامنځته کړي دي. د دې ډلې د تېرو څلورو کلونو ضد بشري کړنې، د جنسیتي آپارتاید پالیسي، او فاشیستي چلندونه، او همداراز په وروستیو ورځو کې د هغوی ظالمانه اقدامات دا حقیقت روښانه کوي.
له همدې امله، موږ یو ځل بیا له ټولو نړیوالو بنسټونو او نږدې او لرې هېوادونو غوښتنه کوو چې له دې ډلې سره یو اړخیز تعامل، چې نه قانوني مشروعیت لري او نه د افغانستان د خلکو حتا یوه کوچنۍ برخه نمایندګي کوي، پای ته ورسوي. دا ډله د سیمې لپاره د لویو ترهګریزو ګواښونو زمینه برابروي، او که له دې سره تعامل پای ته ونهرسېږي، نو ژر یا وروسته، د دې ډلې د پیاوړتیا زیان به پر ټولو واوړي.
د افغانستان د ژغورنې لپاره ملي مجمع