د ۲۰۲۶ میلادي نوي کال د رارسېدو په مناسبت د نړۍ ټولو خلکو، ازادو ملتونو، دولتونو او انساني ټولنو ته چې د سولې، عدالت او سولهییز ګډ ژوند په هیله کې دي، او په ځانګړې توګه د افغانستان زجرېدلي او سرافراز ولس، د هېواد دننه او بهر ټولو هېوادوالو ته، خپل صمیمانه مبارکي او نېکې هیلې وړاندې کوو.
۲۰۲۵ میلادي کال د نړۍ لپاره، په ځانګړي ډول د منځني ختیځ سیمې او د نړۍ د ګڼو نورو برخو لپاره، یو سخت کال و چې له کړکېچونو، خونړیو شخړو، سیاسي بېثباتیو، انساني ناورینونو او د ملکي وګړو له پراخو کړاوونو ډک و. د جګړو دوام، د تاوتریخوالي پراختیا، د بېځایه کېدنې زیاتوالی او د بشري حقونو نقض د بشریت وجدان ژور ټپي کړ او یو ځل بیا یې د تلپاتې سولې لپاره د ګډو نړیوالو هڅو اړتیا روښانه کړه.
په دې لړ کې، د افغانستان خلک هم لا هم د طالبانو د استبدادي کړنو، ژورو انساني، اقتصادي او ټولنیزو بحرانونو، او له بنسټیزو حقونو څخه د پراخ محرومیت، په ځانګړي ډول د ښځو او نجونو د حقونو د سلبېدو، له پایلو سره مخ دي. سره له دې، زموږ د ملت په منځ کې د مقاومت روحيه، د راتلونکي هیله او د خپل برخلیک د ټاکلو باور ژوندی او ټینګ پاتې دی.
د افغانستان د ژغورنې لپاره د ملي مقاومت عالي شورا، د هېواد د خلکو د صبر او ټینګښت درناوی کوي او یو ځل بیا د ازادۍ، ټولنیز عدالت، د قانون حاکمیت، د انساني کرامت ساتنې او د خلکو د رښتینې ارادې پر بنسټ د نظام د ټینګښت لپاره خپلې مسؤلانه مبارزې ته پر ژمنتیا ټینګار کوي. موږ باور لرو چې تلپاتې سوله، که په افغانستان کې وي او که په نړۍ کې، یوازې د ټولشموله خبرو اترو، د قدرت د انحصار پای ته رسولو، د بشري حقونو د درناوي او د رښتینې نړیوالې همکارۍ له لارې ترلاسه کېدای شي.
په ۲۰۲۶ نوي کال کې هیله لرو چې دا کال د تاوتریخوالي د کمېدو، د جګړو د پای، د انساني زخمونو د رغېدو، د نړیوالې یووالي د پیاوړتیا او د افراطیت، تروریزم او جګړو څخه د پاکې نړۍ پر لور د حرکت د پیل ټکی وګرځي؛ داسې نړۍ چې په کې سوله، عدالت او انساني کرامت ګډ او عملي ارزښتونه شي.
د افغانستان د خلکو او د نړۍ د ټولو ملتونو لپاره د سولې، امنیت، روغتیا او ارامۍ څخه ډک کال په هیله.