بسم الله الرحمن الرحیم
اۉن-بېشینچی اگوست، حاکمیت طالبان گروهیگه تاپشیریلگنینینگ بېشینچی ییللیگی مملکت معاصر تاریخیدهگی اچّیق و تقدیری واقعهنی اېسگه سالهدی؛ بو واقعه نهفقط دولت قوریلیشی، دېموکراسی و ترقیات جریانینی تۉختهتدی، بلکه افغانستاننی قورقینچلی، حاکمیتنی انحصار قیلووچی و ملی مشروعیتگه اېگه بۉلمهگن بیر گروه حکمرانلیگی آستیده قالدیردی همده خلقیمیزنی اۉز تاریخیدهگی اېنگ چوقور سیاسی، اقتصادی، اجتماعی و انسانی بحرانلردن بیری بیلن یوزمه-یوز قالدیردی.
بوگون، بېش ییل اۉتگنیدن سۉنگ هم افغانستان طالبان گروهینینگ باستیرووچی سیاستی اسیرلیگیده قالماقده؛ کوچ ایشلهتیش، مخالفلرنی یۉق قیلیش، حاکمیتنی انحصار اېتیش و خلق ارادهسینی انکار اېتیشگه تیهنگن بو گروه مملکتنی خلقارا انزوا، اقتصادی تنزل و اجتماعي تفاوتلرنینگ کېنگهییشی تامان آلیب بارماقده.
افغانستاننی قوتقریش اوچون ملی توپلنمهسی و افغانستاننی قوتقریش اوچون ملی مقاومت عالی کېنگشی آزادلیک، عدالت، دېموکراسی و افغانستان مستقللیگی یۉلیده شهید بۉلگن برچه انسانلرنینگ خاطرهسینی یاد اېتیب، شونینگدېک، استبداد و ترورچیلیکنینگ برچه قربانلریگه حرمت بجا کېلتیرگن حالده، قوییدهگیلرنی اۉزلرینینگ عمومي یاندهشوولری صفتیده اعلان قیلهدیلر:
بیرینچی: بیز متعصب طالبان گروهینینگ افغانستان اوستیدن حکمرانلیگینی کوچ و زۉرآورلیکنی مجبورا اۉتکزیش نتیجهسی دېب بیلهمیز و اونی خلقنینگ اېرکین ارادهسیگه اساسلنگن مشروعیتدن محروم دېب حسابلهیمیز. اوشبو حالتنینگ دوام اېتیشی بحران، بېقرارلیک، سیاسی انزوا و افغانستان خلقینینگ چېکسیز عذابلری دوام اېتیشینینگ اساسی عاملی دیر.
ایکّینچی: بیز طالبان گروهینینگ اۉزباشیمچهلیک بیلن حبسگه آلیش، قییناققه سالیش، سۉز اېرکینلیگینی باستیریش، اېرکین عامهوی اخبارات واسطهلرینی جیم قیلیش، ملَکهلی متخصصلرنی چېتلهتیش، قۉرقوو و دهشت محیطینی یرهتیش همده وطنداشلرنی اېنگ عادی انسانی حقوقلردن محروم قیلیش بیلن بیرگه آلیب بارهیاتگن ظالمانه، انحصار اېتووچی و باستیرووچی سیاستینی اېنگ قطعی طرزده قارهلهیمیز.
اوچینچیدن: بیز طالبان گروهی تامانیدن عملگه آشیریلگن کېنگ کۉلملی قیرغینلر، محکمهدن تشقری قاتللیکلر، مجبوری غایب بۉلیشلر و یشهش حقوقینینگ باشقه جدّی بوزیلیشلرینی اېنگ قطعی طرزده قارهلهیمیز. ایشانچلی ملی و خلقارا منبعلر بو کبی یوزلب، حتا مینگلب حالتلر صادر بۉلگنینی بیر نېچه بار خبر قیلگن. اوشبو حرکتلرنینگ دوام اېتیشی انسان حقوقلری، عدالت تمایللری و خلقارا مجبوريتلرنینگ آچیقدن-آچیق بوزیلیشی بۉلیب، افغانستانده قۉرقوو، ایشانچسیزلیک و انسانی بحراننینگ دوام اېتیشیگه سبب بۉلماقده. بیز مستقل تېرگاو اۉتکزیش، اوشبو جنایتلر عیبدارلرینی جوابگرلیککه تارتیش و بو جریانگه زودلیک بیلن برهم بېریشنی طلب قیلهمیز.
تۉرتینچی: بیز طالبان گروهی تامانیدن انسان حقوقلریگه قرشی فرمانلرنینگ ایزچیل چیقریلیشینی، خصوصاً، عیاللر و قیزلرنی تعلیم، تحصیل، ایش، اجتماعی و سیاسی فعالیتدن محروم قیلیشنی، شخصی و وطنداشلیک اېرکینلیکلرینی چېکلشنی همده عیاللرنی جماعت میدانیدن تیزیملی روشده چیقریب تشلشنی انسان قدر-قیمتیگه قرشی آچیق جنایت و انساننینگ بنیادی حقوقلرینینگ آچیق بوزیلیشی دېب بیلهمیز. بو سیاستلر نهفقط افغانستان کېلهجگینی، بلکه کېینگی اولادلر کېلهجگینی هم جدّی خوف آستیده قالدیردی.
بېشینچی: بیز چوقور خواطر بیلن قومی و مذهبی کمسیتیش سیاستینینگ کوچهییشینی قارهلهیمیز. افغانستان خلقلری، خصوصاً، هزارهلر و شیعه مذهبی ایزداشلریگه نسبتاً آچیق کمسیتیش، اولرنی تېنگ وطنداشلیک حقوقلریدن محروم قیلیش، دینی اېرکینلیکلرنی انکار اېتیش و سۉنگگی دوردهگی کمسیتووچی مناسبتلر عدالت، ملی همجهتلیک، اسلامی قدریتلر و افغانستان وطنداشلرینینگ اساسی حقوقلری تمایللریگه ضددیر. افغانستان برچه اېتنیک گروهلر و مذهبلرنینگ عمومی اویی دیر و هېچ بیر گروه اېتنیک کېلیب چیقیشی، دینی یاکه تیلی اساسیده مملکت وطنداشلری اۉرتهسیده کمسیتیشگه حقلی اېمس.
آلتینچی: بیز افغانستانده ترورچی گروهلر فعالیتینینگ کېنگهییشی و اولرنینگ موجودلیگیدن کېلیب چیقهدیگن تهدیدلر یوزهسیدن چوقور خواطر بیلدیرهمیز. اوشبو گروهلر فعالیتینینگ دوام اېتیشی افغانستان، منطقه و دنیا خوفسیزلیگی و برقرارلیگینی جدّی خوف آستیده قالدیریب، افراطیت، زۉرآورلیک و بېقرارلیکنینگ کېنگهییشی اوچون زمینه یرهتماقده. بیز افغانستان حدودیدن ترورچی گروهلر تامانیدن فایدهلنیلیشینینگ آلدینی آلیش، تروریزمنینگ برچه شکللریگه قرشی کورهشیش و اوشبو عمومی تهدیدنی برطرف اېتیش اوچون خلقارا همجمعیتینینگ مسؤولیتلی همکارلیگینی تأمینلش بۉییچه ثمرهلی چارهلر کۉریش ضرورلیگیگه اورغو بېرهمیز.
یېتّینچی: بیز طالبان گروهینینگ ثمرهسیز و انحصار اېتووچی سیاستینینگ بېواسطه نتیجهسی بۉلگن مملکتدهگی اَینچلی اقتصادی وضعیتنی چوقور تشویشلی دېب حسابلهیمیز. قشّاقلیکنینگ مثلی کۉریلمهگن درجهده کېنگهییشی، ایشسیزلیک، اقتصادیاتنینگ تنزلگه یوز توتیشی، ایشلب چیقریش فعالیتینینگ تۉختشی، سرمایه کېریتیشلرنینگ کمهییشی، اهالینینگ انسانپرورلیک یاردمگه قرهملیگینینگ آرتیشی، یاشلر، ضیالیلر و ملَکهلی متخصصلرنینگ عامهوی مهاجرتی همده جمعیتده امیدسیزلیکنینگ کېنگهییشی افغانستاننی انسانی فلاکت خوفی آستیده قالدیردی.
سکّیزینچی: بیز متعصب طالبان گروهیگه قرشی ملی مسؤولیت حسسی بیلن توریب، آزادلیک، عدالت، دېموکراسی، مستقللیکنی سقلش، حدودی مستقللیک و افغانستان خلقینینگ قدر-قیمتی اوچون کورهشهیاتگن برچه اېرکین کوچلر، ملی سیمالر، قرشیلیک جبههلری و برچه آقیملردن صمیمی منّتدارمیز همده اولرنینگ قانونی قرشیلیگینی افغانستان خلقینینگ استبداد و انحصاردن خلاص بۉلیش اوچون طبيعی حقوقینینگ بیر قسمی دېب بیلهمیز.
تۉقّیزینچی: بیز افغانستان عیاللرینینگ اېنگ آغیر شرایطلرده، تهدید، قماق، قییناقلر و کېنگ کۉلملی باسیملرگه قرهمهی، آزادلیک، تېنگلیک و عدالت غایهلرینی حمایه قیلگن جسارتلی و الهاملنتیرووچی کورهشلرینی فخر بیلن آلقیشلهیمیز. افغانستان عیاللری اۉزلرینینگ تاریخی قرشیلیکلری بیلن افغانستان جمعیتینینگ اویغاق وجدانی و افراطچیلیک همده استبدادگه قرشی مدنی قرشیلیگینینگ رمزیگه ایلندیلر.
اۉنینچی: بیز خلقارا همجمعیتی، بیرلشگن ملتلر تشکیلاتی، اسلام همکارلیک تشکیلاتی، اروپا اتفاقی، خلقارا انسان حقوقلری تشکیلاتلری و برچه مسؤول حکومتلردن انسان حقوقلرینینگ تیزیملی روشده بوزیلیشی، مذهبی و قومی کمسیتیش، عیاللرنی باستیریش، اۉزباشیمچهلیک بیلن حبسگه آلیش و طالبان گروهینینگ مستبد سیاستی قرشیسیده سکوت سقلهمسلیکنی همده اوشبو گروهنی رسمیلشتیریشگه آلیب کېلهدیگن هر قندهی حرکتدن باش تارتیشلرینی سۉرهیمیز.
اۉن بیرینچی: بیز افغانستاننینگ کېلهجگی فقط خلقنینگ اېرکین ارادهسیدن کېلیب چیققن، سیلاولر، عدالت، قانون استوارلیگی، برچه اېتنیک گروهلر و مذهبلرنینگ عدالتلی اشتراکی، انسان حقوقلریگه رعایه قیلیش، ملی بیرلیکنی سقلش و انسان قدر-قیمتینی حرمت قیلیشگه اساسلنگن تیزیم اۉرنهتیلیشی بیلنگینه کفالتلنیشیگه ایشانهمیز.
اۉن ایکّینچی: بیز برچه سیاسی کوچلر، ملی شخصلر، علمالر، ضیالیلر، یاشلر، عیاللر، مدنی جماعهلیک و وطننینگ برچه فرزندلرینی بیرلیک، همجهتلیک و اۉزارا یقینلیکنی سقلهگن حالده افغانستاننی موجود بحراندن قوتقریش، استبدادگه برهم بېریش، عدالتنی قرار تاپتیریش، برقرار تینچلیکنی تأمینلش همده کېنگ قمراولی و دېموکراتیک تیزیم یرهتیش یۉلیده مسؤولیت بیلن و بیرلیکده حرکت قیلیشگه دعوت اېتهمیز.
جمهوریت تیزیمی قولهگنینینگ بېشینچی ییللیگیده بیز افغانستاننینگ شرفلی خلقی بیلن ینه بیر بار عهدلشهمیز که اولر بیلن بیرگه آزادلیک، عدالت، تېنگلیک، ملی غرور و برچه وطنداشلرنینگ حقوقلرینی حمایه قیلیش همده خلق ارادهسیگه اساسلنگن آزاد، آباد و مستقل افغانستاننی برپا اېتیش یۉلیده هېچ قندهی قانونی سعی-حرکتنی ایهمهگن حالده کورهشیمیزنی دوام اېتتیرهمیز.
یشهسین اېرکین، مستقل، بیرلشگن و دېموکراتیک افغانستان.
افغانستاننی قوتقریش اوچون ملی توپلنمهسی
افغانستاننی قوتقریش اوچون ملی مقاومت عالی کېنگشی
۲۴ اسد ۱۴۰۵