شورای عالی مقاومت ملی برای نجات افغانستان، با ابراز سپاس عمیق و صمیمانه از دولت برادر و هم‌فرهنگ جمهوری تاجیکستان، به‌خاطر میزبانی کریمانه و اقدامات انسان‌دوستانه‌اش در قبال مهاجرین افغانستان، بر این باور است که رویکردهای مسؤولانه و مبتنی بر اصول حقوق بین‌الملل، همواره جایگاه دولت تاجیکستان را در معادلات منطقه‌ای و جهانی، درخشان‌تر ساخته است.
در پرتو تحولات تلخ و نگران‌کننده‌ی سیاسی، امنیتی و حقوق بشری در افغانستان، صدها هزار شهروند این کشور ناگزیر به ترک سرزمین خویش شده‌اند. بازگشت اجباری آنان، در شرایطی که افغانستان همچنان از حداقل‌های امنیت، حاکمیت قانون، و حفاظت از جان و آزادی‌های بنیادی شهروندان بی‌بهره است، نه تنها می‌تواند نقض تعهدات بین‌المللی در قبال حقوق پناهجویان تلقی شود، بلکه با مخاطرات جدی انسانی و پیامدهای منطقه‌ای همراه خواهد بود.
علاوه بر آن، بخش بزرگی از مهاجرین افغانستان در تاجیکستان دارای ویزا و اقامت قانونی‌اند و حضورشان در چهارچوب قوانین ملی و نظم عمومی این کشور صورت گرفته است.
از همین‌رو، شورای عالی مقاومت ملی، با اتکاء بر اصول مشترک همزیستی، برادری فرهنگی و ارزش‌های جهانی حقوق بشر، احترامانه از دولت محترم جمهوری تاجیکستان تقاضا می‌نماید، تا از هرگونه اقدام در راستای اخراج اجباری مهاجرین افغانستان خودداری نموده، و سیاست‌های حمایتی و انسانی خویش را تا مشخص شدن وضعیت افغانستان تداوم بخشد.
ما اطمینان داریم که رهبری فرهیخته و ملت بزرگ تاجیکستان، همچنان در کنار مردم مظلوم افغانستان ایستاده، در تعامل با نهادهای بین‌المللی، برای یافتن راه‌حل‌های اساسی و مبتنی بر کرامت انسانی مهاجرین، نقش برجسته‌ی خویش را ایفا خواهند نمود.