د افغانستان د ژغورنې لپاره د ملي مقاومت عالي شورا، په واشنګټن ډي سي کې د ملي ګارد پر دوو غړو وروستۍ حمله غندي. دا جنايت، تر دې چې يو ترهګريز عمل دی، د يو فرد کار دی او هېڅکله بايد د يو ملت د ګډ مسئوليت په توګه تعبير نه شي. په هېڅ اخلاقي، حقوقي او سياسي اصل کې د منلو وړ نه ده چې يو ملت چې پخپله د کلونو ترهګرۍ قرباني پاتې شوی، د يو فرد د وحشيانه کړنې په بدل کې تاوان ورکړي.
تجربه ښيي چې دا ډول ناوړه پیښې یوازې د متحده ایالاتو پورې محدودې نه دي؛ اروپا هم ډیری وختونه د ورته کړنو شاهده ده. له همدې امله، د مهاجرینو ټولنې سره په بیړه چلند کول نه یوازې غیر عادلانه دي، بلکې دا د ستونزې اصلي حل هم نه کوي.
عالي شورا يو ځل بيا ټينګار کوي چې د ترهګرۍ سره د مبارزې لاره د مهاجرت په دوسيو د محدوديتونو په لګولو کې نه را لنډېږي. د ترور او تاوتريخوالي اصلي سرچينه هغه فعالې ترهګرې شبکې دي چې د طالبانو د مستبدې ډلې تر واک لاندې افغانستان کې ځاله جوړوي؛ هغه ډله چې افغانستان يې د ترهګرو د خوندي پټنځي باندی بدل کړی او د تاوتريخوالي د صادرېدو زمينه يې له افغانستان هاخوا برابر کړې ده. د نړۍ په ډېرو افراطي کړنو کې د الهام سرچينه هماغه ترهګريز جوړښتونه دي چې د تېرو کلونو په ترڅ کې د طالب ډلې په لمن کې پياوړي شوي دي.
ملي مقاومت شورا د متحده ايالاتو د هغې پرېکړې په اړه خپله جدي اندېښنه څرګندوي چې له مخې يې د افغان وګړو د ټولو مهاجرتي غوښتنليکونو سمدستي څېړنه ځنډول کېږي. دغه ډول پرېکړې کولای شي زرګونه بېګناه او زيان منونکي افغانان، چې د طالبانو له منګولو خلاص شوي، په يوه نوي انساني ناورين کې ټيل وهي.
د ولسمشر ټرمپ وروستۍ څرګندونې چې د واشنګټن ډزې يې يو ترهګريز عمل بللی او د افغانانو د ورتګ پروسه يې د بيا کتنې وړ ګڼلې او همدارنګه د افغانستان د “د ځمکې پر مخ جهنمي کندې” په نوم يادول، زموږ اندېښنې دوه برابره کوي. د عالي شورا له نظره، حقيقت دا دی چې طالبان او د دوی سيمه ييز ملاتړي افغانستان د ځمکې پر مخ جهنمي کندې ته اړولی، نه افغان ملت چې پخپله د دې ظالمانه او ترهګريز جوړښت لومړنی قرباني دی.
له همدې امله، موږ د نوي امريکايي حکومت او ټولو نړيوالو متحدينو غوښتنه کوو چې:
د کډوالۍ په اړه په پریکړو کې، دوی باید د افغانستان د مظلومو خلکو او د طالبانو د ظالمې ډلې ترمنځ واضح توپیر وکړي؛ د مجرم پر ځای قرباني ته سزا ورنکړي؛ او په ځمکه کې د واقعیتونو په درک کولو سره، له هر هغه پالیسۍ څخه ډډه وکړي چې په غیر ارادي ډول طالبان پیاوړي کوي یا د افغانستان بې دفاع اتباع کمزوري کوي.
د افغانستان د ژغورنې لپاره ملي مقاومت عالي شورا، چې د ترهګرۍ او استبداد پر ضد د مبارزې په لومړۍ کرښه کې يو ستر سياسي چتر دی، له ټولو نړيوالو شريکانو سره د بنسټيزو او دوامدارو حللارو په لټه کې د رغندې همکارۍ لپاره چمتو ده، څو د طالب ډلې له واکه سرچينه اخيستونکو ترهګريزو ګواښونو سره مبارزه وشي.