د افغانستان د ژغورنې لپاره د ملي مقاومت عالي شورا، د افغانستان د وضعیت په اړه د تهران د سیمهییزې ناستې جوړېدل، د هېواد د څو بعدي کړکېچ پر وړاندې د سیمې د پراخې پاملرنې په چوکاټ کې، یو د ستاینې وړ ګام بولي چې د افغانستان مسئله د سیمې په سیاسي او دیپلوماتیک اجنډا کې ژوندۍ ساتي، او د کوربه هېواد، د ایران اسلامي جمهوریت، او د ګډون کوونکو هېوادونو د استازو له هڅو څخه مننه کوي.
د ملي مقاومت عالي شورا ټینګار کوي چې د داسې ناستو دوام او اغېزمنتیا هغه مهال د افغانستان د خلکو د واقعي ګټو په خدمت کې تمامېدلی شي چې د نړیوالې ټولنې له فعال، همغږي او مسئولانه ملاتړ سره مل وي، او د اوسني وضعیت د بدلون، د سیاسي بنبست د پای ته رسولو، او په افغانستان کې د تلپاتې سولې او ثبات د برابرولو په لور تنظیم شي. بېشکه، مقطعي او له روښانه لیدلوري بېبرخې تګلارې د اوسني کړکېچ د ژورتیا لپاره بسنه نه کوي.
دا شورا یو ځل بیا ټینګار کوي چې سیمهییزې او نړیوالې ناستې باید په هدفمند ډول د افغانستان د خلکو د عالي ګټو د تأمین، د عادلانه سولې د ملاتړ، د تلپاتې ثبات او د یو مشروع، ټولشموله او ځوابویونکي سیاسي نظام د رامنځته کېدو په موخه ترسره شي، او له ټولو سیمهییزو او نړیوالو لوبغاړو غواړي چې په دې لاره کې خپل رول په مسئولانه، همغږي او د منل شویو نړیوالو اصولو پر بنسټ ادا کړي