۲۶ دلو د افغانستان د معاصر تاریخ له تر ټولو مهمو پړاوونو څخه یو یادوونکی ورځ ده؛ هغه ورځ چې د شوروي اتحاد ځواکونو ماتې وخوړه او له افغانستانه ووتل، او دا پېښه د هېواد د خلکو د اشغال او بهرني تسلط پر وړاندې د درېدو، قربانۍ او ازادۍ د سمبول په توګه وګرځېده. دا تاریخي مناسبت د افغانستان زغمناک او مقاوم ملت ته مبارک وایو او درناوی یې کوو.
په هغه مهال کې د شوروي ځواکونو اشغال او یرغل د ښکاره لاسوهنې په چوکاټ کې او د وخت د لاسپوڅي حکومت په ملاتړ ترسره شو؛ هغه اقدام چې د ملي او نړیوالو منل شوو اصولو پر خلاف و او د هېواد پر سیاسي، ټولنیز او امنیتي ژوند یې پراخې اغېزې وکړې. د دې پایله کې د ملي پرېکړو خپلواکي کمزورې شوه او د هېواد حاکمیتي جوړښتونه سخت زیانمن شول.
د دې وضعیت پر وړاندې، د افغانستان بېلابېلو قشرونو خلکو د ډېرو ستونزو او درنو انساني او مادي لګښتونو په منلو سره مقاومت پیل کړ. دغه پراخ مقاومت، له کلونو نابرابرې جګړې وروسته، بالاخره مقابل لوری د ماتې منلو ته اړ کړ او د شوروي یرغلګرو ځواکونو ماتې او له افغانستانه وتلو ته یې لاره هواره کړه؛ هغه پېښه چې د ۱۳۶۷ لمریز کال د دلو په ۲۶مه په رسمي ډول تحقق وموند.
بې له شکه، د هېواد د تاریخ دغه پړاو له ژورو زیانونو سره مل و. د جګړې میلیونونه قربانیان، پراخه کډوالي، د بنسټیزو تاسیساتو ویجاړېدل او دوامدار رواني او ټولنیز ټپونه هغه پایلې دي چې د افغانستان خلکو وزغملې. خو همدا تاریخي تجربه دا وښوده چې پر بهرنیو قدرتونو تکیا او د خلکو د ارادې او حقونو له پامه غورځول، پایله کې له ناکامۍ او ړنګېدو پرته بله پایله نه لري.
د افغانستان د ژغورنې لپاره د ملي مقاومت عالي شورا د دې ورځې په لمانځلو ټینګار کوي چې خپلواکي، ملي حاکمیت او انساني کرامت هغه ارزښتونه دي چې یوازې د خلکو پر اراده او د ښاریزو حقونو پر درناوي پایدار پاتې کېدای شي. د تېرو تجربو څخه باید د راتلونکي لپاره درس واخیستل شي، څو له ګرانبیه تېروتنو د بیا تکرار مخه ونیول شي.
نن ورځ دا مناسبت په داسې حال کې لمانځو چې افغانستان یو ځل بیا نه یوازې له جدي سیاسي، امنیتي او ټولنیزو ننګونو سره مخ دی، بلکې په عملي توګه د یوې داسې ډلې تر ولکې لاندې دی چې له بهرنیو توطیو سره تړلې او روزل شوې ده. د افراطیت پراخېدل، ترهګریز ګواښونه او د بنسټیزو ښاریزو حقونو محدودېدل، په ملي او نړیواله کچه ژورې اندېښنې رامنځته کړې دي او د افغانستان خلک مکلف دي چې خپل هېواد له دې تپل شوي وضعیت څخه وژغوري.
د ملي مقاومت شورا د خلکوواکۍ، ټولنیز عدالت، د قانون حاکمیت او د ښاریزو د برابر حقونو د تأمین پر اصولو ولاړه، په هېواد کې د دوامدارې سولې او رښتینې ثبات د ترلاسه کولو لپاره پر سولهییزو، مسوولانه او ټولشمولو هڅو ټینګار کوي. موږ باور لرو چې د افغانستان راتلونکی یوازې د خبرو اترو، ملي مشارکت او د ټولنیز او سیاسي تنوع پر درناوي جوړېدای شي.
په پای کې، د تېرو څو لسیزو جګړو او بحرانونو د ټولو قربانیانو د یاد په درناوي سره، هیله څرګندوو چې دا تاریخي ورځ د ازاد، عادلانه او باثباته افغانستان د جوړولو لپاره د یووالي، پوهاوي او ګډ تعهد الهامبخښونکې وګرځي.