بسم الله الرحمن الرحیم
د عاشورای حسینی د ورځو د رارسیدو په مناسبت ټولو مسلمانانو، په ځانګړې توګه د افغانستان مسلمانانو او د کربلا د مظلومو شهیدانو پیروانو ته تسلیت وایو.
په افغانستان کې سږکال د عاشورا د عزادارۍ او غم مراسم په داسې حال کې ترسره کیږي چې د دغو مراسمو جوړونکي د واکمنې ډلې له خوا د سخت فشار لاندې دي او بېسارې محدودیتونه پرې لګول شوي دي. په تېرو ورځو او شپو کې د طالبانو ترهګرې ډلې وسلهوالو پرته له دې چې د حسینی عزادارانو توهین او تحقیر وکړي، د عاشورا نښانونه لرې کړي او په مختلفو سیمو کې یې یو شمېر علما او ځوانان نیولي او شکنجه کړي دي، چې دا کار د خلکو د وېرې او نا آرامۍ سبب شوی دی.
په خواشینۍ سره چې دا ډار او تاوتریخوالی د عاشورا د ورځو د امنیت د تامینولو په پلمه ترسره کیږي چې د بشری جنایتونو یوه ښکاره بیلګه او د خلکو له مشروع آزادیو څخه محرومول او د هغوی روحی امنیت له منځه وړل دی.
د یو اړخیز او مداخله کوونکي طرزالعمل پر بنسټ چې د دې ډلې او د هغې د بدنامو عناصرو لخوا د امر بالمعروف او نهی عن المنکر د ادارې په نوم خپور شوی دی، د عاشورا د مراسمو په ترسره کولو کې هر ډول ازادي له تنظیموونکو څخه اخیستل شوې ده. په دې غیر انساني او ظالمانه طرزالعمل کې د عاشورا مراسم یوازې په درې ورځو محدود شوي او حتی د اهل سنت ګډون په کې منع شوی دی. همدارنګه، د دې ډلې له متحجرانه نظریاتو سره په مخالفت کې د واعظانو او خطیبانو هر ډول وینا او د اهل تشیع علماو او روحانیونو لخوا د عاشورا د مراسمو او د هغې د ترسره کولو په اړه له رسنیو سره مرکې کول منع شوي دي.
دې تړون کې نور عجیب او غریب محدودیتونه هم راغلي دي چې هیڅ انساني او اسلامي بنسټ نلري. د څو نوم ورکو او نامعلومو کسانو په لاسلیکونو چې نه کوم صلاحیت لري او نه کومه ټولنیزه، سیاسي، مذهبي او علمي درجه، دا شرمناکه مقرره لاسلیک کړی ده. د هغوی په عمل باید یوازې خواشیني څرګنده شي.
د افغانستان د ژغورنې لپاره د ملي مقاومت عالي شورا د عاشورا د ورځې په مناسبت، د ظالم او یزید په شان طالبانو له خوا د حسینی عزادارانو تحقیر، سپکاوی، نیول او بندیان کول په کلکه غندي.
بېله شکه، د عاشورا د عزادارۍ په مراسمو بې ساري محدودیتونه لګول د دې ډلې د یزید په شان ظلمونو او تېریو یوه برخه ده چې د افغانستان پر خلکو ترسره کیږي او په خواشینۍ سره، د نړۍ په سترګو په وړاندی او په ښکاره ترسره کیږي. خو په ډېره خواشینۍ سره، نړۍ د دې ظلمونو عادي کول او د دې ضد بشري جنایاتو عاملینو سره تعامل کوي. له همدې امله، موږ یو ځل بیا له د سیمې او نړۍ هیوادونو څخه غواړو چې له دې متحجر او ظالمې ډلې سره یو اړخیز تعامل پر ځای، د افغانستان د خلکو غږ واوري او له هغوی سره همغږي وکړي ترڅو زموږ له هیواد څخه د ظلم او بحران ټغر ټول شي.
په افغانستان کې د سنیانو او شیعه ګانو د پیروانو تر منځ اخوت او ورورګلوۍ تر اوسه د ټولو اسلامي هېوادونو لپاره ښه بېلګه ده او هیله لرو چې د طالبانو دغه افراطي او تعصبی کړنې به په افغانستان کې پر ښو اړیکو او اسلامي وحدت منفي اغېز ونه کړي.