د افغانستان د ژغورنې لپاره د ملي مقاومت عالي شورا په ډېرې خواشینۍ او ژور تأسف سره، د زړور او فداکار قومندان جنرال اکرامالدین سریع او قومندان امینالماس شهادت د افغانستان د خلکو او د حقطلبۍ او عدالتغوښتنې جبهې لپاره ستره ضایعه ګڼي.
شهید جنرال اکرامالدین سریع د هېواد له وتلو او ژمنو پوځي څېرو څخه و، چې خپل ټول عمر یې په رښتینولۍ د افغانستان د خلکو د عزت، خپلواکۍ، امنیت او کرامت د دفاع په لاره کې تېر کړ، او په پای کې یې هم په همدې ویاړلې لاره کې خپل ژوند د ملي او انساني لوړو آرمانونو لپاره قربان کړ.
د ملي مقاومت عالي شورا خبرداری ورکوي چې د هدفي او له پولو اوښتو بریدونو دوام د سیمې په کچه د بشري او سیاسي امنیت پر وضعیت جدي اغېز کوي او د هغو مسؤلینو، کارکوونکو او سیاسي او پوځي څېرو ژوند چې د جمهوریت له دورې سره تړاو لري او دا مهال له هېواده بهر مېشت دي، له زیاتېدونکي ګواښ سره مخ کوي. د دې خطرناک بهیر د پایلو مستقیم مسؤلیت به د دې تاوتریخوالي د تګلارې د طراحانو، آمرانو او ملاتړو پر غاړه وي.
د ملي مقاومت عالي شورا د شته شواهدو او قراینو پر بنسټ، د دغو هدفي ترورونو سیاسي او اخلاقي مسؤلیت پر مستبدې طالب ډلې وراچوي او دا کړنه د افغانستان له پولو هاخوا د مخالفانو د فزیکي وجود له منځه وړلو د سیاست دوام بولي. شورا د ایران اسلامي جمهوریت له دولت څخه غوښتنه کوي چې په بشپړ جديت سره د دې جنایت عاملین او آمران وپېژني او عدلي او قضایي تعقیب یې کړي، او اجازه ورنه کړي چې د هغه هېواد خاوره د ترهګریزو کړنو او سیاسي تصفیاتو په ډګر بدله شي.\
د ملي مقاومت عالي شورا د دغو جنایتکارو کړنو د غندلو تر څنګ، د دغو دوو زړورو قومندانانو شهادت د هغوی درنو کورنیو، همرزمانو، یارانو او د افغانستان ټولو شریفو خلکو ته تسلیت وایي، او له لوی خدایه د دغو دوو درنو شهیدانو لپاره د درجې لوړوالی، او د پاتې شویو لپاره د جمیل صبر او ستر اجر دعا کوي.
یاد او نوم یې تلپاتې او لاره یې له پیروانو ډکه وي