بسم الله الرحمن الرحیم
په ډېرې خواشینۍ سره مو خبر ترلاسه کړ، چې په بغلان، تخار، غور، هرات، بدخشان، بادغیس، جوزجان، نیمروز او سمنګان ولایتونو کې د ویجاړونکو سېلابونو طبیعي ناورین زموږ د لسګونو هېوادوالو ژوند واخیست او په زرګونو کورنیو ته یې ډېر مالي زیانونه واړول. موږ خپلو ټولو هیوادوالو او په ځانګړې توګه د دې زړه بوږنونکې او بې سارې پیښې ژوندي پاتې شویو او قربانیانو ته د تسلیت مراتب وړاندې کوو او په دې غم کې ځان شریک ګڼو. د لوی خدای له دربار څخه شهیدانو ته د فردوس جنت او ټولو ټپیانو ته شفأ او کورنیو ته د جمیل صبر غوښتنه کوو.
همدارنګه د وروستیو اورښتونو او سیلابونو په پایله کې د هېواد د یو شمېر نورو ولایتونو اوسېدونکو ته هم زیانونه اوښتي او له بده مرغه چې د وروستیو طبیعي پېښو له امله د رامنځته شویو زیانونو د مخنیوي لپاره هېڅ اداره او اورګان نشته. چه زموږ د ځوریدلي خلکو زخمونه مرهم کړي.
دا وحشتناکه او خرابکاره پېښې په داسې حال کې شوي چې له بده مرغه هېواد د مشروع او حساب ورکوونکي حکومت او د سم مدیریت د نشتوالي په خلا کې ژوند کوي. د شته جاهلانو او پرديپالو ډلو وژنو، شکنجو، نيولو، اختطاف، ظلم او وحشت د افغانستان د مظلومو او بې دفاع خلکو د ژوند مصؤنيت قطع کړیدی او اوس هم دردناکو طبيعي پېښو د دوی بې شمېره کړاوونه زيات کړي دي.
د افغانستان دژغورنی لپاره د ملي مقاومت شورا په موخه د نړۍ له ټولو هېوادونو، نړیوالو موسسو، سوداګرو، صرافانو او په بهر کې له مېشتو هېوادوالو غوښتنه کوي چې د هېواد په بېلابېلو ولایتونو کې د سېلابونو او بارانونو له امله له زیانمنو شویو خلګو سره له هرې ممکنې لارې مرسته وکړي. زموږ د زیانمن شویو او اغیزمنو خلکو دمشکل دکمولو لپاره.
یو ځل بیا د هېواد په ولایاتو کې د سېلابونو په غمجنه پېښه کې د خپلو لسګونو مظلومو او ځورېدلو هېوادوالو د شهادت او د دغې پېښې له امله رامنځته شوې ناخوالې ته د تسلیت مراتب وړاندې کوو او د قربانیانو یاد ته درناوی کوو.