د افغانستان د اسلامي جمهوریت حکومت د ۱۳۹۸ لمریز کال د دلوې په ۲۱مه نېټه، د میزان ۲۹مه د اوزبیکي ملي ژبې د ورځې په توګه ونوموله او په رسمي تقویم کې یې ثبت کړه. له هغه وروسته، هر کال په افغانستان کې له دې ورځې د خوږې اوزبیکي ملي ژبې د ورځې په توګه لمانځنه کېږي.
د افغانستان د ژغورنې لپاره د ملي مقاومت عالي شورا د میزان ۲۹مه، د اوزبیکي ملي ژبې ورځ، ټولو دیندارو افغانانو، په ځانګړي ډول د اوزبیکي ژبې ویونکو او د اوزبیکي فرهنګ او ادب مینهوالو ته مبارکي او نېکې هیلې وړاندې کوي.
اوزبیکي ژبه د ملي هویت او فرهنګي ستنې په توګه د اوزبیکيژبو خلکو د لرغوني تمدن څرګندوی ده. د اوزبیکي ژبې شتون زموږ د افغانستان د فرهنګ په تنوع او ښکلا کې زیاتوالی راوستی دی. له ۲۰۰۱ کال څخه وروسته، په افغانستان کې رسنۍ په اوزبیکي ژبه پرانیستل شوې او پراخه خپرونې یې کولې. په ځینو پوهنتونونو، ښوونځیو، او تعلیمي مرکزونو کې ځینې درسونه په خوږه اوزبیکي ژبه تدریس او زدهکړه کېدل.
خو، له بده مرغه، له هغې وروسته چې واک د جهل او د ادب او فرهنګ ضد ډلې ته وسپارل شو، ډېرې دغه رسنۍ او تعلیمي مرکزونه وتړل شول. د طالبانو انحصاري سیاستونو نه یوازې د هېواد قومي، ژبني، او فرهنګي تنوع رد کړې، بلکې په هېواد کې د ژبو او فرهنګي نښو د له منځه وړلو هڅه کوي.
له همدې امله، د دې ارزښتمنې ژبې ساتنه، چې د هېواد د نورو رايجو ژبو ترڅنګ، د علم، فرهنګ، او ادب له بډایه ژبو څخه ده، د ټولو زموږ دنده ده. باید د هغې په ساتنه او پراختیا کې هڅه وکړو، څو دا ارزښتمن فرهنګي او ادبي میراث راتلونکو نسلونو ته انتقال شي.
د افغانستان د ژغورنې لپاره د ملي مقاومت عالي شورا یو ځل بیا د میزان ۲۹مه، د اوزبیکي ملي ژبې ورځ، ټولو افغانانو ته مبارکي وایي او هیله لري چې دا مبارکه ورځ د فرهنګي اړیکو د پیاوړتیا، د ملي یووالي د ټینګېدو او د ملي ویاړونو د لوړولو لامل وګرځي.