14 جدي — اۉزبېک و تورکمن تیللری نینگ رسمي تیل صفتیده تن آلینگن کونی — افغانستان نینگ زمانوي تاریخیده مهم مدني و حقوقي یوتوقلردن بیری بۉلیب، مملکتیمیزدهگی تیل خیلمه-خیللیگی و مدني بایلیک نینگ تن آلینگنینی افادهلهیدیگن یارقین رمز دیر.
افغانستان ملتی نینگ اۉزیگه خاصلیگی تورلی اېلتلر، تیللر و مدنیتلر نینگ همجهتلیکده یشهشی بیلن معنا کسب اېتهدی.
افغانستاننی قوتقریش اوچون ملي عالي قرشیلیک کېنگشی اوشبو مدني و تاریخي سنهنی برچه اۉزبېک–تورکمن وطنداشلریمیزگه همده تېنگلیک، انسان قدر-قیمتی و ملي بیردملیک تمایللریگه ایشانهدیگن برچه مملکت یشاوچیلریگه صمیمي مبارکباد اېتهدی.
شو بیلن بیرگه، کېنگش چقور تشویش بیلن تأکیدلهیدیکی، بوگون مستبد و ترورچی طالبلر گروهی حکمرانلیگی آستیده افغانستان نینگ تیللری، مدنیتی و ملي میراثی مقصدلی همده تیزیملی روشده چېتگه سوریلماقده و مجبوري یکّهلنیشگه دچار اېتیلماقده. بو خواطرلی حالت نهفقط وطنداشلر نینگ مدني حقوقلرینی، بلکه ملي بیرلیک و تینچ-تاتوو یشهش اساسلرینی هم جدّي خوف آستیگه قۉیماقده.
ملي عالي قرشیلیک کېنگشی شوندهی فکردهکی، ملي تیللرنی، جملهدن اۉزبېک و تورکمن تیللرینی اسرهش، رواجلنتیریش و ترغیب قیلیش مملکت نینگ برچه یشاوچیلری اوچون قانوني، تاریخي و انکار اېتیب بۉلمهیدیگن حقوقدیر. هېچ قندهی مستبد و افراطی توزوم بو قانوني حقوقلرنی انکار اېتیشی یاکه چېکلشی ممکن اېمس.
اوشبو کوننی احترام بیلن نشانلر اېکن، کېنگش ینه بیر بار افغانستاندهگی برچه اېلتلر نینگ مدني، تیل و وطنداشلیک حقوقلرینی حمایه قیلیش بارهسیدهگی قطعي مجبوريتینی تصدیقلهیدی همده مملکتنی یکّه حاکیملیک، کمسیتیش و استبداد دایرهسیدن آلیب چیقیش نینگ یگانه یۉلی صفتیده خلق نینگ اېرکین ارادهسیگه اساسلنگن و عدالتلی تیزیمنی شکللنتیریش ضرورلیگینی ینه بیر بار تأکیدلهیدی