مملکت نی قوتقریش ملی مقاومت کینگاشی، افغانستان نینگ برچه ایرکین، آزاده و شجاع عیاللرینی سککزینچی مارچ خلق ارا خاتین۔ قیزلر بیردملیک کونی مناسبتی بیلن تبریکله ب، نه فقط عیاللر، بلکه بوتون افغانستان خلقی حیاتی گه سایه سالگن بو قارانغو دور، امکان قدر تیزراق، اوتیب کیتیشینی کوته میز
اوشبو کوره ش لر سببلی، بیز افغانستان نینگ برچه خلقی، اینیقسه، مملکتیمیزنینگ آزادی طلب وکوره شچی عیاللری، حق۔ حقوق ایزلب کوره ش گن لری باعث، بیرگه لیکده اوشبو کوره ش لر ثمره سی گه شاهد بوله میز.
سککیزینچی مارچ ۔ خلق ارا خاتین۔قیزلربیردم لیک کونی، افسوس که، افغانستان نینگ ایرکین و آزاده خاتین۔ قیزلری، شجاع و زحمتکش عیاللری نه فقط افراطی گروه تامانیدن گرو گه آلینگن، بلگه ایرکین لیک دن هم محروم بولگن بیر وضعیتده اوچ ییلدن بویان نشانلنماقده. البته، انسان نینگ برچه قانونی و اساسی حق و ایرکین لیک لری تعلیم، تحصیل و ایش بولسه، اوشبو خاتین۔ قیزلر اساسی حق لریدن محروم بولیب، اوز اوی لریگه قمب قوییلگن لر. افغانستان مملکتی، عیاللری نینگ اوقیش و ایشلش حق۔حقوق لریدن محروم بولگن دنیاده گی بیرینچی دولت دیر. اوشبو مملکت عیاللری طالب لر گروهی تامانیدن هرکونی، باسیم، قییناق، اوغیرلش و هر خیل تضییق لرگه دوچ بولماقده، اولرنینگ ناراضی لیک نمایش لری، ییغین لری باستیریلیب، قنچه انسان لر هم اوز باشیمچه لیک بیلن اولدیریلماقده لر. همده، حاکمیت افراطی گروه گه تاپشیریلگنی دن سونگ، طالب لر استه۔سیکین خاتین۔ قیزلرگه قرشی حرکت قیلیب، ینه ده، عینن آلدینگی قارانغو دَورلری هجری۔شمسی 1376۔1380 ییللری گه قیتیب، طالمانه عمل لرنی قیلماقده لر.
طالب لرنینگ بو ظالمانه عمل لر نی قیلیشی، بو لرنینگ ایسکی تفکری ده هیچ قنده ی اوزگریش بولمه گنی و اوتگن ییگیرمه ییل دوامیده ایریشگن یوتوق لر، اورته دن کیته یاتگنی نینگ جوده یققال دلیلی دیر. افسوس که بو حالت نینگ دوام ایتیشی افغانستان نی آرقه گه قالدیریب و خلقمیز و دنیا اوچون خوفلی کیله جکنی اورته گه کیلتیره دی. و مینگ لب انسان حق لری و عیاللرنی حمایه قیلیش موسسه لری فعالیت یوریته یاتگن و اساسی تینک لیک، عدالت و ایرکین لیککه اساسلنگن دنیاده بیزنینگ میلیون لب عیاللریمیز، اساسی حقلریدن محروم بولماقده. بولر ایسه، اسلام و شرعیت بهانه سیده هر کونی حبس گه آلینه دی، قییناققه سالینه دی و اولدیریله دی لر.
سککیزینچی مارچ ۔ یامان اقتصادی و تبعیض آمیز وضعیت گه قرشی چیققن و نهایت ایرکین لیک و انسان حق لری گه برابر ایریشگن عیاللرنینگ آزادلیک کوره شلری حقیده ایسلتمه دیر. بنابران، بو کون یورتیمیز عیاللری اوچون باشقه جای لردن کوره کوپراق الهاملنتیرووچی و عبرت لی بولیب، افغانستان عیاللری «توپراغیمنی آلدینگ، سباق لریم و مشق قیلیشیمنی آلمه» دیگن مضمونلی شعار بیلن برماغینی قویگنی گه تولیق ایشانه میز. و جمعیت نینگ آگاه لیک و اویغه نیش تامیرلری و شونگه اوخشش، اوتمیش لردیک سککیزینچی مارچ کوره شچی لری، افغانستان تاریخیده اسلام دینی بوییچه افتخارلی عیاللری و غرورلی خاتین۔ قیزلری بولیب، عدالت اوچون کوره شیب، حرکت لرینی دوام ایتتیریش لری حقیقتن کیله جک اوچون خلقیمیز گه امید بیره دی.
افسوس که دنیا حاضرگچه بوگونگی اچچیق واقعیتلرنی اعتبارسیز قالدیریب، طالب لر گروهی نینگ ماهیتی و عیاللرگه نسبتن توتگن اورنینی، برچه جنایت و یامانلیک لرینی بیلیب توریب، افغانستان خاتین۔ قیزلریگه اساسن قوییلگن چیکلاولرنی آلیب تشلش اوچون ثمره لی حرکت قیلمه دی. اما بیر نیچه مرته دولت لر اوز لری نینگ اساسی مسوولیت لرینی اونوتیب، طالب لرگروهی بیلن علاقه قیلیش وحتی اولرنی قوللب۔ قوتلش گه اوریندیلر.
شونینگ اوچون بیز برچه انسان حق لری تشکیلات لری، خلق ارا تشکیلات لر همده یقین و اوزاق دولت لردن افغانستان خلقینی، اینیقسه مملکتیمیز عیاللرینی سیاست نینگ مُرَکّب عالمیده اونوتمسلیک لرینی، اوز ارا همکارلیک قیلیش و طالب لرگروهینی قوللب۔ قوتلش اورنی گه، بونگه مجبورلش لرینی ایسته یمیز.
افغانستان ده بیرارته عیال هم قماققه تشلنمه یدیگن کون نی ایستب،، افغانستان خاتین۔ قیزلری، افغانستان ایرککلری بیلن یانمه۔ یان ، کونگیللری شاد بولیب، روح لری تینچ، کولگی لی لب لربیلن مملکت ترقیاتی و رونقی اوچون ایشلش لری و زحمت قیلیش لری ممکن بولگن کون کیلیشی گه امید قیله میز.