یو سل درې کاله وړاندې د ۱۹۲۱ میلادي کال د مارچ په لومړۍ نېټه د افغانستان او ترکیې ترمنځ د همکارۍ او اتحاد لومړی تړون د دواړو هېوادونو د مترقی او نوښتګرو مشرانو له خوا لاسلیک شو ، له هغه وخت راهيسې د دواړو هېوادونو ترمنځ اړيکې ښې حسنه او په بېلابېلو برخو کې د مثبتو او رغنده همکاريو پر بنسټ ولاړې دي.
د دواړو هېوادونو ترمنځ په اداري، ديپلوماتيکو، نظامي، اقتصادي، روغتيايي او فرهنګي برخو کې همکاري شوې ده. د افغانستان دولت او خلک د ترکیې د خلکو د ازادۍ په جګړه کې د خپلو ترکي وروڼو ترڅنګ ولاړ او د هغوی ملاتړ یې وکړ. افغانستان یو له لومړنیو هیوادونو څخه و چې د ترکیې لویه ملي شورا یې په رسمیت وپیژندله او تل یې په نړیوالو فورمونو کې د ترکیې د دوست او ورور هیواد ملاتړي پاتې شوی دی.
ترکیه چې یو دوست او ورور هیواد دی، په تیرو کلونو کې یې د عصري کولو او پرمختګ په برخه کې له افغانستان سره مرسته کړې او د افغانستان د ځوان نسل لپاره د ښوونې او روزنې په برخه کې یو ډیر مناسب او غوره تعلیمی انتخاب وه، دا همکارۍ په ځانګړې توګه په افغانستان کې د جمهوري نظام په شلو کلونو کې په زړه پوری او اغېزمنې وې.
د افغانستان د ژغورنې لپاره د ملی مقاومت شورا د دواړو هېوادونو ترمنځ د دوستۍ او دیپلوماتیکو اړیکو د ۱۰۳مې کلیزې د رارسېدو په مناسبت له افغانستان سره د ترکیې د حکومت او خلکو د دوامداره ملاتړ قدرداني کوي. دغه شورا همدا راز هیله لري چې دوست او ورور هېواد ترکیه زموږ په هېواد کې وروستیو پرمختګونو او د کړکېچ د ژوروالي په پام کې نیولو سره، له بېلابېلو ډیپلوماتیکو او فرصتونو له لارې خپلې هڅې دوه چنده کړي او په اوسنی حالت کی د افغانستان له خلکو سره په دې برخه کې همکاري وکړي.
بې له شکه چې ترکیه د سیمې او اسلامي نړۍ د یو لوی هیواد په توګه کولای شي په اوسني بهیر کې له سیاسي اړخه هم مهم رول ولوبوي او له افغان مهاجرینو سره د مرستې او د افغان ځوانانو د زده کړې په برخه کې د پخوا په پرتله زیاتې اسانتیاوې برابرې کړي. له همدې امله یو ځل بیا د تیرو مرستو د قدردانۍ په ترڅ کې له خپل دوست او ورور هیواد ترکیې څخه غوښتنه کوو چې په اوسني ستونزمن حالت کې له دغه هیواد څخه د افغان مهاجرینو د ایستلو د بهیر مخه ونیسي. موږ همداراز هیله لرو چې زموږ خلک به د اسلامي او نړیوالو ارزښتونو ته ژمن او یو مشروع قانونمنده حکومت ته په رسیدو کې له موږ سره مرسته وکړي.