بسم الله الرحمن الرحیم
إِنَّا لِلّهِ وَإِنَّا إِلَيْهِ رَاجِعُونَ
د اسلامي نړۍ سترې علمي او ديني ټولنې او د نجف اشرف ویاړلې علمي حوزې خپل یو له تر ټولو نومیالیو علماوو او اغېزناکو مراجعو څخه له لاسه ورکړ، او د فقاهت، علم او معنویت له محفل څخه یوه ځلانده شمعه مړه شوه.
د افغانستان د ژغورنې لپاره د ملي مقاومت عالي شورا په ژورې خواشینۍ او درد سره د حضرت آیتالله العظمی شیخ محمد اسحاق فیاض (رحمة الله علیه) د مړینې له امله، چې د تقلید ستر مرجع او د نجف اشرف د علمي حوزې له سترو علمي ستونو څخه و، د افغانستان دروند ملت، اسلامي امت او د هغه مرحوم ټول مینهوال او ارادتمندان ته د زړه له کومې تسلیت وړاندې کوي.
دغه ستر عالم، چې د غزني ولایت د جاغوري ولسوالۍ په یوه متدینه او متواضعه کورنۍ کې زېږېدلی و، د اسلامي علومو د زده کړې لپاره د ټینګې ارادې سره نجف اشرف ته ولاړ او د خپلې بېسارې هڅې، نبوغ او زیار په برکت د علم او اجتهاد تر لوړو پوړیو ورسېد. نوموړي د نجف د حوزې له سترو استادانو، لکه آیتالله العظمی سید محسن حکیم، سید ابوالقاسم خویي، سید محمود شاهرودي او شیخ حسین حلي څخه علمي ګټه واخیسته او د اسلامي فقهې او اصولو په ډګر کې د معاصرې زمانې له مخکښو فقیهانو او علماوو څخه وګرځېد.
مرحوم آیتالله العظمی فیاض د تدریس، څېړنې او تألیف په اوږدو کلونو کې اسلامي معارفو او د اهلبیتو (علیهم السلام) مکتب ته ستر خدمتونه ترسره کړل او د اسلامي فقهې، اصولو او معاصرو اسلامي موضوعاتو په اړه یې ارزښتناک علمي آثار پرېښودل. د نوموړي فقهي او اجتهادي نظریات د اسلامي ټولنو د نوو او اړینو مسئلو په اړه د علمي او ديني کړیو د پام وړ وو.
د خپل ستر استاد حضرت آیتالله العظمی سید ابوالقاسم خویي له وفات وروسته، نوموړي د دیني مرجعیت دروند مسئولیت پر غاړه واخیست او د نجف اشرف د نورو سترو مراجعو ترڅنګ یې د دیني لارښوونې، د اسلامي علومو د زدهکوونکو د روزنې او د حوزې د علمي میراث د ساتنې په برخه کې مهم رول ولوباوه. هغه د نړۍ په بېلابېلو هېوادونو کې د مسلمانانو، په ځانګړي ډول د اهلبیتو (علیهم السلام) د پیروانو ترمنځ له ځانګړي درناوي او لوړ مقام څخه برخمن و.
دغه ستر مرجع، د خپلو علمي او ديني فعالیتونو ترڅنګ، تل د افغانستان د خلکو ستونزو او اړتیاوو ته متوجه و او د جګړو، بېوزلۍ او بشري ناورینونو په سختو کلونو کې یې د خپل دفتر اړوندو خیریه بنسټونو له لارې اړمنو خلکو او زیانمنو کورنیو ته ارزښتناکې مرستې او ملاتړ برابر کړی و.
د افغانستان د ژغورنې لپاره د ملي مقاومت عالي شورا دغه ستره ضایعه د حضرت ولي عصر (عج)، د تقلید سترو مراجعو، د نجف اشرف علمي حوزې، علماوو، شاګردانو، مقلدانو او د مرحوم مرجع ټولو ارادتمندانو ته، په ځانګړي ډول د هغه درنې کورنۍ او د هغه د قدرمن زوی حضرت حجتالاسلام والمسلمین شیخ محمود فیاض ته، په اخلاص سره تسلیت او تعزیت وړاندې کوي او ځان په دې ستر غم کې شریک ګڼي.
له لوی خدای څخه د دغه ستر فقیه او د دین خدمتګار لپاره د الهي رحمت پراخوالی، د درجاتو لوړوالی او د رسول اکرم (ص) او اهلبیتو طاهرینو (ع) سره ملګرتیا غواړو، او د هغه پاتې کورنۍ، شاګردانو او مینهوالو ته د صبر، زغم او لوی اجر غوښتنه کوو.